- 007 -
1470 (2. września) ZnojmoMiasto w Rep. Czeskiej., w niedzielę po św. Idzim etc.
Pierwszy porządek monetarny króla Macieja KorwinaMaciej Korwin (łac.: Matthias Corvinus, węg.: Hunyadi Mátyás, zwany Sprawiedliwym, węg. Igazságos), król Węgier, Chorwacji od 1458 i Czech od 1469 roku..
— Wir Mathias von gots gnaden zu Hungern zu Behmen etc. konig marggrave zu Merhern herczog in Slezien etc. bekennen offenlich mit disem brieff vor allermeniglich, nochdem wir in unserm furstentumb Slesien und sunderlich in unser stat Breslaw eine newe munsz slahen und machen lassen, nun ist unser ernstliche meynung, das man mit derselben unser munsz allenthalben also halden sal in aller mosz als hynoch geschriben ist.
Zum ersten das unser munszmeister Herman Silberprenner slahen und machen sal vierczig groschen vor ein Ungrischen gulden und ye czwelffe haller vor ein groschen, und dieselbe münsz an groschen und hallern sal gemacht werden an korne und schrote noch ynhald unsers munszbrieffs, den wir demselben unsern munszmeister gegeben haben.
Item nochdem wir demselben unseren munszmeister empfolhen haben czway iar nocheinander zu munszen, so sich dieselben czway iar gancz verlauffen werden, haben wir erlaubt und in crafft dicz brieffs erlauben unsern lieben getrewen burgermaister und rate stat Breslaw hinfur solh munsz zu machen an korne und schrote noch lawt desselben munszbrieffs.
Item ab bin den czwain iaren so vil munsz gemacht wurd, doran denselben unsern landen genuglich wer, so bepfelhen wir unsern lieben getrewen rattmannen zu Breslaw und dem egenanten unserm munszmeister Hermann dorynne ein aufsehen zu haben, das uberflussige munsz nicht gemacht wurd.
Item es ist auch unser meynung, das ein yder kauffman, der gold ader silber ken Breslaw brengen wurd, das er dasselb ynvoran dem benanten unsern munszmeister ansage, ab er dasselb kauffen wolle. So denn derselb munszmeistr dasselb nicht kauffen wolld ader sich mit dem kauffman nicht mochte umb den kauff vertragen, so mag der kauffman dasselb gold ader silber verkauffen ader furen frey und ungehindert wohin ader wem er will noch sein besten guttdunken.
Item so wellen wir auch, das solh obgenant munsz auffs schirist awsgeen sal an einer bekwemen zeit noch unser lieben getrewen rattmannen zu Breslaw erkentnisz, denwir das empfolhen haben, domit die lewt mit der alden munsz zu grossen schaden nicht komen dorfften.
Item es ist unser ernstliche meynung und bepfelhnisz, das der genant unser munszmeister solh munsz machen sal an korne und schrote noch ynhald unsers munszbrieffs, den wir im geben haben, dobey wir ernstlich empfehlen unsern lieben getrewen den bemelten rattmannen zu Breslaw gutt auffsehen zu haben und dobey eynen ader czwen gesworne bewerte probiren von unsern wegen auffzunemen, die do auffsehen, das die munsz in solher wird an korne und schrote, an anfang und end behalden werde. Und ab sichs ergebe, das ein mol ader czwier die munsz anders von den genanten unsern probirern erfunden wurd und das an gevar geschehe, so sal man dieselb munsz widerumb gissen und zu seinem rechten obnberurten korne widerbringen. So aber die genanten unser probirer erkennen wurden, das solhe munsz zu vil und offt mit gevar vercleinet und verkorczt wurd, und bey iren benanten wurden nicht gemacht, so sollen sy denselben munszmeistr auffheben und noch seinem verdiensten stroffen.
Item noch dem wir auch demselben unserem munszmeistr empfolhen haben Ungrisch gold ze munszen, ist unser ernstliche meynung, das er dieselb guldene munsz machen sal an grat und gewicht allenthalben als die gulden im land zu Hungern yczund an grad und gewicht gemacht werden; dobey wir auch den benanten unsern lieben getrewen rattmannen zu Breslaw naben den egemelten unsern probirern bepfelhen gut auffsehen zu haben, das die genant guldene munsz in solcher wird an grat und gewicht gemacht wird allenthalben bey solher bepfelhnis und busz als oben bey der silberen munsz begriffen ist.
Item wir wollen auch und bepfelhen unsern lieben getrewen den offgenanten rattmannen zu Breslaw allen unsern geniesz, der uns von der genanten unser munsz gevallen sal an gold und an silber noch ynhald des munszbrieffs von dem benanten unserm munszmeistr zu empfohen und einzunemen von unsern wegen, und wenn der edel unser lieber getrewr Francz von Hag unser haubtman in Slesien ettwas von solhem gelde an in fordern wurd, so sollen sy im dasselb uberantworten und vorreichen, das ist unser ernstliche meynung. Mit urkund dicz brieffs versigelt mit unserm koniglichen angedruckten insigl.
Geben zu Znaym am sontag noch des heiligen Egidij tag anno domini millesimo quadringentesimo septuagesimo, unser reich des Hungrischen im dreuczehenden und des Behmischen im anderen iaren.